منظومه هوژبر سلطان سر گذشت
منظومه هوژبر سلطون
سرگذشت
( اسد الله خان باوند سوادکوهی )
در گویش مردم منطقه مرکزی مازندران سوادکوه :
نیشت بیمه خنه و بیمه بی گمون / سه تا شیر بچه دارنه امیر تامون
سهم الممالک و رئیس قاشون / سیف الله خان سرتیپ شیرین زبون
پرو چشمه سر ونه ناهار خارون / خبر بیمو از سوی قشون
چه خبر دارنی هوژبر سلطون / سراغ خرنوا بیمو یزدون
گنه دستگیر هاکنم هوژبر سلطون / این گپ ره بشناسه هوژبر سلطون
راهی بیه خنه تهیه بهیره شوم / . . .
صدا هاکرده ای خواخر گلون / دوشتره ره ته دکون قند و چایی و نون
امشو عقیده ام هسته شبیخون / ماه سو جا بیمو کنار قشون
نشون هاکرده چادر یزدون / بیگمون بورده چادر یزدون
دستگیر هاکرده یزدون پهلون / برمه برمه بیه میون قشون
هوژبر همراه بورده یزدون پهلون / یزدون ره بورده تا شه خنه میون
بورده خدمت امیراکرم نوم / امیر باهوته شما نکوشین یزدون پهلون
تیر خالی هاکنین سمت بیابون / هوژبر راهی بیه سمت مازرون
پلی هاکرده سرخل نسوم / سنگر بهیته دبرار میون
اون روز بجنگسته روز تا نماشون / اون همه قاشون ره هاکرده داغون
راه دکته هوژبر سمت مازرون / خرابه تلار و ونه دم زنون
امیر اکرم نیشته بیه تلار میون / رمل ونه پیش و کشیه قلیون
نظر هاکرده راست خیابون / بدیه درانه چند هزارتا قاشون
باته دست و پا جمع هاکنین دوست و رفقون / امه دنبال بمونه چند هزار تا قاشون
هوژبر باته پیر مگه عقلت بیه توم / تموم ایرون ره بیره قاشون
هنوز سر زنده هسته هوژبر سلطون / این حرف وشون نهیه توم
ملج و نمدار خال ره وا بدا تکوم / شصت تیر صدا بکرده گوخسه میون
پلی هاکردنه کج نسا نسوم / همینتی بوردنه سمت ارزمون
ارزمون دهیه شیخ نادعلی نوم / دعوت بخواسته وه ونه نوکرون
استکان چایی هوژبر دهون / نظر هاکرده راست خیابون
بدیه در انه چند هزارتا قشون / سنگر هاکرده کهنه تنشورون
انده بکوشته تا لشکر بهیه توم / ائی راهی بیه سمت ترکمون
بین راه هنیشته با چندتا گت گتون / . . .
قرآن مهر هاکرده امیر اکرم نوم / دعوت بوره هوژبر و ونه یارون
قسم یاد هاکرده امیر اکرم نوم / قسم یاد هاکرده هوژبر برارون
قسم یاد هاکردنه ونه یارون / بی سلاح بوهرن دعوت وشون
سلام علیک و تعارف نهیه تموم / دستگیر هاکردنه هوژبر سلطون
دست ره دوستنه با بزمی ریسمون / هوژبر شونک ره هداه تکوم
پاره هاکرده بزمی ریسمون / دباره بیاردنه سیم تلفن
دوستنه کت جفت برارون / هوژبر رو هاکرده باهوته ای زن فلون
مگه کم بیه امه بره و راغون / اما بهیم دعوت امیر ارم نوم
هوژبر بیچاره بدا تکوم / بورده گوشت و پوست بند بیه استخون
نماسر ورو نم نم بارون / بهشهر خرابه هوژبر بیه تیر بارون
...................................................................
دآب تنگه تنگه هوژبر ته گلون بمیره
شصت تیر دنگه دنگه هوژبر ته گلون بمیره
گلیله اموهه تنگ تنگ سینه هوژبر ته گلون بمیره
هوژبر غرنه غرنه هوژبر ته گلون بمیره
هوژبر آدم ره خرنه هوژبر ته گلون بمیره
این اشعار را ابوالخیر سنجابی از روستای اساس بیاد داشته که خود ایشان تاکید میکرد که قسمتی از آنرا فراموش کرده یا تغییر داده شده که می بایست اصلاح گردد.لذا خوانندگان عزیز می توانند در این خصوص اصلاحیه های خود را اعلام نمایند .
